þam halig god hlyt geteode ut on þæt igland þær ænig þa git ellþeodigra eðles ne mihte blædes brucan. Oft him bonena hand on herefelda hearde gesceode. Eal wæs þæt mearcland morðre bewunden, feondes facne, folcstede gumena, hæleða eðel. Næs þær hlafes wist werum on þam wonge, ne wæteres drync to bruconne, ah hie blod ond fel, fira flæschoman, feorrancumenra, ðegon geond þa þeode. Swelc wæs þeaw hira þæt hie æghwylcne ellðeodigra dydan him to mose meteþearfendum, þara þe þæt ealand utan sohte. Swylc wæs þæs folces freoðoleas tacen, unlædra eafoð, þæt hie eagena gesihð, hettend heorogrimme, heafodgimmas agetton gealgmode gara ordum.